Flavio R. Benito, Maestru Gaiteru, pertenez a la xeneración asturiana d'a finales del sieglu XX que dio tantos y tan nobles intérpretes a la nuestra música tradicional.

El so historial como profesor inclúi una amplia riestra d'actividaes rellacionaes cola enseñanza de la gaita, siempres nel ámbetu xeneral de la música tradicional asturiana, y que va del llabor didácticu n'escueles municipales de música a la creación y direición de bandes de gaites, ensin escaecer la publicación secuenciada de trabayos musicales destinaos a facilitar l'aprendizaxe del instrumentu musical asturianu por escelencia.

A Flavio R. Benito debemos, tamién, les interesantísimes colecciones de partitures pa gaita integraes en cancioneros tradicionales asturianos, melodíes de diferentes países, manuales d'enseñanza y llibretes d'exercicios pa estudiantes de gaita.

Del so valir creador dan preba les numberoses pieces de composición propia, con una cadarma na que s'aldovina la orientación p'hacia la didáctica de la gaita y nes qu'apaecen reflexos claros del so pasu pelos distintos países nos que dio cursos de música tradicional asturiana.

Les posibilidaes qu'esti cursu ufierta a toa persona que lu emplegue pal aprendizaxe de la gaita, en cualisquier de los niveles, dende los  primeros pasos d'aniciu hasta'l virtuosismu, son infinites.

L'esfuerzu fechu por Flavio R. Benito quedará compensáu en cuantes cadún de nós, xuniendo la dedicación al estudiu a la estructura gradual d'esti programa de trabayu, consiga saca-yos el máximu rendimientu a les enseñances conteníes nesti cursu de gaita.