Flavio Rodríguez Benito (Uviéu 1971)

Naz nuna familia vinculada al folclore asturianu y dende neñu participa del ambiente rellacionáu cola gaita.

A mediaos de los años 80 entama los estudios de gaita asturiana colos maestros Fernando Requexu, Juan José Prado (Beleño) y  Xuacu Amieva. De la mesma, empecipia estudios oficiales de música na especialidá de Flauta Travesera, cursando anguaño los últimos cursos del Grau Mediu.

Trabayó con munches agrupaciones folclóriques, ente les que destaquen: Los Urogallos, Banda de Gaites Naranco y Andecha Folclor d’Uviéu. Con esta última collabora dacuando na trescripción de melodíes y la grabación de discos.

Formó parte de dellos grupos folk, destacando sobre manera la so participación en Llan de Cubel, colos que fai xires pel mundu alantre ente 1992 y 1997 y participa na grabación de los discos L’Otru llau de la mar  y Llan de Cubel IV.

Participó en munchos cursos de formación y tien toles  acreditaciones que da’l Principáu d’Asturies como “Maestru Gaiteru”.

Foi finalista de concursos, como solista o na dirección de bandes de gaites: CulturAquí, Macallan, Ciudá d’Uviéu...

Impartió cursos de gaita en mui bien de conceyos asturianos, como Cangas del Narcea, Carreño, Gozón, Uviéu, Riosa... Y en Centros Asturianos de tol mundu: Zaragoza, Lausana, Xinebra, La Habana y Buenos Aires. Nesti últimu cásique tolos años de 1992 p’acá.

Participó na grabación de más de 15 discos y dio conciertos como solista, dirixendo bandes de gaites como Xaranzana, Xana,  La Raitana o como miembru de Nordés y Llan de Cubel en cuatro continentes.