MARA

Música de la tierra onde nació ye lo que mos regala Flavio Benito nel so primer discu en solitario. El títulu d’esti trabayu, Mara ye más que’l nome de la so fía: Ye mar, ye monte... y ye’l vinculu milenariu col ambiente rural d’Asturies.

La naturaleza y la forma de vida de los paisanos entra nel espaciu urbanu de los gaiteros asturianos de los años ochenta; l’ánimu por redescubrir lo propio  traduzse en música pal sieglu XXI.

Nos doce temes que formen esti primer álbum en solitario,  enllázase la música de gaita más tradicional (Les Mudances, Saltón) y les composiciones nueves qu’aporta l’artista (Aguiar 203, Valdeflora, Mara). En “100 Años nel ríu La Plata” fai homenaxe a los alumnos del Centru Asturianu de Buenos Aires y a la emigración asturiana a América.

Na realización d’esti discu acompañaron a Flavio músicos nombraos: Ígor Medio, productor musical del discu (Bouzouki de Felpeyu), Ara Costas (Voz), Salva López (Teclaos), Lisardo Prieto (Vigulín), Castor Castro (Flauta), Daniel Lombas (Percusión). Y les collaboraciones de Javier Tejedor (Acordión) en Rumba d’Ibias, Fonsu Fernández (Zanfona) en Xotes de L.laciana y Fonduveiga y Pablo Pumarada (Djembé) na Rumba d’Ibias.

Tuvi’l placer de sentir y escuchar darréu esti discu y apoderóme la muncha sensibilidá y la técnica esquisita qu’amuesa Flavio Benito dominando’l nuestru instrumentu entrañable. Tengo de felicitalu con tola sinceridá pol enfotu y l’afición que tien esti rapaz, exemplu de la nuestra segunda xeneración de gaiteros, la que ye quien a componer y al tiempu iguar la partitura de la melodía tradicional. Por eso ye que tengo de felicitar tamién a toles persones que gocien escuchando la so música fresca y brillante. Ello ye que saludo cola mio sincera noragüena a Flavio, a los sos músicos y tolos que tengan la prestosa suerte d’oyer el so trabayu escelente.

Joaquín Manzanares Rodríguez-Mir (Cronista d'Asturies). 14 de mayu de 2002.